Дзяржаўны
каталог Музейнага фонду
Рэспублікі Беларусь
Навіны музейнага жыцця  /  Музейныя вандроўкі. Нясвіжскі гісторыка-краязнаўчы музей

Музейныя вандроўкі. Нясвіжскі гісторыка-краязнаўчы музей


   Нясвіж – горад з багатай гісторыяй, спадчынныя ўладанні рода Радзівілаў – сёння адзін з асноўных турыстычных аб’ектаў Беларусі. Зразумела, што едуць туды ў першую чаргу паглядзець палац, але за палацам без увагі застаецца яшчэ адзін вельмі цікавы па сваіх зборах Нясвіжскі гісторыка-крязнаўчы музей.
   Музей гэты дастаткова малады – фактычна ён заснаваны ў 1986 годзе, калі пачаўся збор матэрыялаў (сёння зборы налічваюць звыш 8,5 тысяч прадметаў), афіцыйна ўтвораны ў 1989 г., упершыню адкрыты для наведвальнікаў у 1994 г. выставай “Нясвіжская скарбніца” (сумесна з Нацыянальным музеем гісторыі і культуры Беларусі і Аб’яднаннем літаратурных музеяў Рэспублікі Беларусь), хаця афіцыйнае адкрыццё адбылося толькі 14 студзеня 1995 года. З 2005 года музей мае статус дзяржаўнай установы і ўключае не толькі ўласна музей, але і кватэру-музей мастака М.К. Сеўрука, ганчарную майстэрню і музейны аб\'ект "Кузня".
   Сам музей размясціўся ў будынку канца ХІХ стагоддзя, дзе спачатку, па некаторых звестках, размяшчалася рамеснае вучылішча, пазней польскія казармы, а да 1989 г. склады вайсковай часткі. 
   Наведаўшы музей, можна пазнаёміцца з легендамі і гісторыяй горада, развіццём
рамяства і гандлю, патрапіўшы быццам бы на Ратушную плошчу Нясвіжа ХІХ – 30-х гг. ХХ ст., укладам жыцця, побытам і культурай сялян Нясвіжчыны канца ХІХ – 1-й чвэрці ХХ ст., даведацца пра ход ваенных канфліктаў ХХ ст. на тэрыторыі Нясвіжскага раёна, а таксама пабачыць выратаваныя каштоўнаці.

   На віртуальнай выставе прадстаўлены некаторыя з найбольш цікавых прадметаў са збора музея: 

   куфель, аздоблены манетамі і медальёнам з выявай Багуслава Радзівіла

   фрагмент скульптуры Святога Вінцэнта, якая знаходзілася ў капліцы, устаноўленай жыхарамі г.Нясвіжа ў 1766 годзе пасля спынення эпідэміі мору (чумы). Пасля разбурэння капліцы ў 1960-х гадах фрагмент скульптуры захоўваўся ў сям\'і Балакіных, а ў 2002 г. быў перададзены ў дар музею Балакіным Аляксандрам Яўгенавічам

   літургічная кніга, якая змяшчае песнапенні 16-17 ст. са старажытнай натацыяй (квадратныя ноты на чатырохрадковым стане), так званы “няўменны запіс”

   графін і шклянка з рэчавага скарба, знойдзенага ў 1988 г. у сутарэннях кляштара бернардзінак. Скарб захоўваўся ў медным чане і складаўся са 141 прадмета сталовага ўжытку – шкляныя вырабы, фарфор, срэбра, пасярэбраныя прадметы. 
  

 

22.03.2013




© "Міністэрства культуры Рэспублікі Беларусь", 2009-2013
© Распрацоўшчык ТAA "НВФ "IНЕАК", 2009