Дзяржаўны
каталог Музейнага фонду
Рэспублікі Беларусь
Навіны музейнага жыцця  /  Музейныя вандроўкі. Гродзенскі дзяржаўны музей гісторыі рэлігіі

Музейныя вандроўкі. Гродзенскі дзяржаўны музей гісторыі рэлігіі


 Гродна – адзін з найстаражытных гарадоў Беларусі. На старонках амаль дзевяці стагоддзяў яго гісторыі – дзейнасць таленавітых дзяржаўных дзеячоў і навукоўцаў, пісьменнікаў і паэтаў, мастакоў і артыстаў, узвядзенне велічных храмаў і замкаў, а таксама – заснаванне музеяў. Сярод гэтых устаноў вылучаецца Гродзенскі дзяржаўны музей гісторыі рэлігіі – адзіны ў Беларусі музей дадзенага профілю.

Музей быў заснаваны 7 ліпеня 1977 г. як Рэспубліканскі музей атэізма і гісторыі рэлігіі, адкрыты для наведвальнікаў з 15 студзеня 1985 г., а сучасную назву атрымаў у 2005 г.

Першая экспазіцыя музея размяшчалася ў архітэктурным ансамблі былога жаночага манастыра Раства Багародзіцы. Пасля таго, як у 1992 г. комплекс быў вернуты вернікам, музей атрымаў двухпавярховы комплекс былога палацапавуліцы Замкавай, 16 (помнік архітэктуры сярэдзіны XVIII ст.) У 2009 г. у музеі была адкрыта першая стацыянарная выстава і канцэртная зала. У кастрычніку 2012 г. адчынілі свае дзверы для наведвальнікаў залы экспазіцыі "Рэлігія і культура ў Беларусі", дзе можна пазнаёміцца з гісторыяй рэлігій і канфесій Беларусі. 

Неаднаразова падкрэслівалася тое, што ў Беларусі стагоддзямі ў згодзе жывуць хрысціяне, мусульмане, іудзеі. Менавіта на экспазіцыі Гродзенскага дзяржаўнага музея гісторыі рэлігіі можна прасачыць суіснаванне побач розных нацыянальнасцяў і як вынік – узаемаўплыў іх культур. 

Асноўны фонд музея налічвае больш за 85 000 адзінак захоўвання. У Гродзенскім дзяржаўным музеі гісторыі рэлігіі захоўваюцца рукапісы, старадрукі, графіка, творы выяўленчага і дэкаратыўна-прыкладнога мастацтва, меднае ліццё, прадметы археалогіі, этнаграфіі, старыя паштоўкі з відамі гарадоў Беларусі, творы сучаснага беларускага мастацтва.

Музеем праводзяцца таксама разнастайныя культурна-адукацыйныя праграмы:“Музей і дзеці”, праграмы для дарослых і дзяцей з абмежаванымі магчымасцямі, папулярнасцю карыстаецца экскурсія па культавых будынках Гродна “Музыка, якая застыла ў камені”, ладзяцца канцэрты духоўнай і класічнай музыкі.

На віртуальнай выставе прадстаўлены найбольш цікавыя музейныя прадметы са збора музея:

амулет-змеявік ХІІІ ст. з выявай Маці Божай – з аднаго боку і змяінага гнязда – з другога, які адлюстроўвае існаваўшую ў часы хрысціянізацыі дваяверніцкую хрысціянска-язычніцкую культуру

бронзавы акваманіл – сасуд для мыцця рук у выглядзе коннага рыцара, які быў перададзены ў музей ў 1979 г. з гісторыка-краязнаўчага музея Літоўскай ССР. У 2-й палове ХІХ - пачатку ХХ ст. ён захоўваўся ў Віленскім музеі старажытнасцяў, а раней, па легендзе, знаходзіўся ў Каложскай царкве ХІІ ст. у Гродна.

абразы: “Маці Божая Адзігітрыя” канца XVI – пачатку XVII ст., “Святая сям’я” Гілярыя Хаецкага XVII ст., “Святая Тэкля” XVII-XVIIІ ст.

драўляныя скульптуры: Святога Казіміра XVII ст., анёла XVIIІ ст.

кнігі: “Евангелле” 1644 г., святая кніга мусульман "Каран" 1862-1863 гг., рукапісная кніга беларускіх татар “Хамаіл” ХІХ ст.

мугір 1912 г. з выслоўямі з Карана і беларускім арнаментам

літургічнае адзенне: далматыка канца XVI ст., арнат з калонай са слуцкіх паясоў XVIII - ХІХ ст.                                                   
 

08.04.2013




© "Міністэрства культуры Рэспублікі Беларусь", 2009-2013
© Распрацоўшчык ТAA "НВФ "IНЕАК", 2009