Дзяржаўны
каталог Музейнага фонду
Рэспублікі Беларусь
Навіны музейнага жыцця  /  Музейныя вандроўкі. Мемарыяльны музей-майстэрня З.І. Азгура

Музейныя вандроўкі. Мемарыяльны музей-майстэрня З.І. Азгура


   У Мінску сканцэнтравана вялікая колькасць музеяў – гістарычных, мастацкіх, літаратурных, але сярод усіх ёсць унікальны – адзіны ў Рэспубліцы Беларусь манаграфічны музей – Мемарыяльны музей-майстэрня З.І.Азгура.
   Музей быў заснаваны пасля смерці Заіра Азгура ў 1996 г. як філіял Нацыянальнага мастацкага музея Рэспублікі Беларусь на базе Творчай майстэрні Акадэміі мастацтваў СССР і асабістай майстэрні скульптара, дзе ў штодзённай працы і клопатах разьбяр правёў каля 11 гадоў, стварыў больш за 50 твораў, а таксама заявіў пра сябе як прызнаны, паважаны педагог. У 2000 г. музей-майстэрня была адкрыта для наведвальнікаў, а ў 2004 стала самастойным муніцыпальным музеем.
   Збор музея быў бязвыплатна перададзены дзяржаве сям’ёй скульптара і зараз складаецца з дзвюх частак: выяўленчыя калекцыі – “Скульптура З.І. Азгура”, “Жывапіс з сям’і З.І. Азгура”, “Графіка з сям’і З.І. Азгура” і мемарыяльны фонд – “Архіў З.І. Азгура”, “Асабістая бібліятэка З.І. Азгура”, “Асабістыя рэчы З.І. Азгура”. 
   Усю плошчу трохпавярховага будынка майстэрні, ўзведзенага ў 1984 г. па праекце архітэктара В.М. Аладава, ахоплівае экспазіцыя музея. У ёй захаваны падзел унутранай прасторы, які склаўся пры Заіры Азгуры, што дазваляе даць найбольш поўнае прадстаўленне аб жыцці і творчасці мастака і прасачыць працэс стварэння скульптурнага твора ад задумы да ўвасаблення.
   Сёння музей гэта не толькі месца памяці – творчая і персанальная майстэрня скульптара Заіра Азгура, але і цэнтр актуальных ініцыятыў у музейна-адукацыйнай сферы, і прастора творчай лабараторыі, у якой рэалізуюць свае самыя смелыя задумы сучасныя мастакі, архітэктары, перформеры, танцоры і музыканты.

На віртуальнай выставе прадстаўлены некаторыя з найбольш цікавых прадметаў са збора музея:

Скульптуры: “Князь Уладзімір Полацкі, 1300 год”
“Партрэт Шаўчэнкі Т.Р.”
“Партрэт Багушэвіча Ф.К.”
“Мадэль помніка Мусаргскаму М.П.”
“Партрэт Бацькі Міная”

Партрэты Заіра Азгура і яго другой жонкі Галіны, напісаныя Гаўрыілам Гарэлавым, цесцем З.Азгура

Фатаграфіі:
Заір Азгур ў майстэрні на вул. Някрасава
Заір Азгур і Пётр Машэраў ў майстэрні на вул. Трактарная, 4
Маргарыта Шашалевіч і Заірыд Азгур – першая жонка скульптара, якая загінула падчас Вялікай Айчыннай вайны, і яго сын
“Балагола. Ламавы павозьнік” – адна з ранніх работ З.Азгура

Асабістыя дакументы з архіва Заіра Азгура: пасведчанне скульптара; членскі білет Маскоўскага Саюза Савецкіх мастакоў

15.04.2013




© "Міністэрства культуры Рэспублікі Беларусь", 2009-2013
© Распрацоўшчык ТAA "НВФ "IНЕАК", 2009