Дзяржаўны
каталог Музейнага фонду
Рэспублікі Беларусь
Навіны музейнага жыцця  /  Музейныя вандроўкі. Мядзельскі музей народнай славы

Музейныя вандроўкі. Мядзельскі музей народнай славы


…I колер блакіту вясновы, 
Шум Нарачы, шэлест дубровы…
Максим Танк

   Нарачанскі край багаты на прыгожыя і цікавыя мясціны – прыродныя, архітэктурныя, гістарычныя, літаратурныя, і, каб адчуць і спазнаць усё багацце краю, спатрэбіцца нямала часу. Але ёсць месца, дзе можна даведацца пра гэтую зямлю ўсяго патроху і адкуль можна пачаць вандроўкі па Мядзельшчыне, і гэтае месца – Мядзельскі музей народнай славы.
   Заснаваны музей быў у 1969 годзе на базе Мядзельскага аддзела культуры і з таго часу ў ім ўжо сабрана даволі буйная калекцыя – больш за 35 тысяч прадметаў. У 1981 годзе для музея быў пабудаваны новы будынак, а з 1989 г. музей пачаў прымаць наведвальнікаў.
   Патрапіўшы ў музей, можна адчуць атмасферу гэтага ляснога і азёрнага краю – рамантычную, прасякнутую глыбокай неспакойнай гісторыяй, легендамі і паданнямі. Гэта адбываецца дзякуючы дэкаратыўнаму аздабленню экспазіцыі, праз якую можна зірнуць на жыццё людзей гэтай зямлі у розныя часы і ў розных абставінах. Пра старажытнасць расказваюць матэрыялы з археалагічных раскопак, сярод якіх унікальная кафля з выявай магчымага герба Мядзела, пра трагічныя падзеі ХХ стагоддзя – дакументы, асабістыя рэчы, лісты, фотаздымкі ўдзельнікаў І і ІІ Сусветных войнаў, пра суіснаванне людзей рознага веравызнання – помнікі мастацтва розных канфесій. Асобная ўвага – галоўнаму прыроднаму багаццю края – азёрам і іх значэнню ў жыцці мясцовых жыхароў. Знаёміць экспазіцыя і з выбітнымі людзьмі, якіх нарадзіла гэта зямля, сярод іх найбольш яскрава вылучаецца імя Максіма Танка, паэта, апантана вернага сям’і і Радзіме. 
   Але музей не застыў у сваёй экспазіцыі, падчас інтэрактыўных і тэатралізаваных мерапрыемстваў ён прапануе не толькі паглядзець, але і “памацаць” гісторыю, адчуць яе водар. 

На віртуальнай выставе прадстаўлены некаторыя з найбольш цікавых прадметаў са збора музея:

Наканечнік стралы ІІІ–ІІ тысячагоддзя да н.э., знойдзены падчас археалагічных раскопак ля ракі Скема выдатным беларускім археолагам, ураджэнцам Мядзельшчыны Міхасём Чарняўскім

Прадметы народнай культуры і побыту:
Ручнік, вытканы і вышыты жыхаркай ужо знікшага хутара Пачанава
парахаўніца і шархуны

Абраз “Святы Мікалай”

Фотаздымкі:
Максім Танк. Гэты здымак народнага паэта Беларусі, ураджэнца в. Пількаўшчына, Мядзельскага раёна, быў зроблены ў лістападзе 1941 г., калі ён быў накіраваны на службу ваенным карэспандэнтам у газету “За Савецкую Беларусь”
Беларусіх паэтаў Якуба Коласа, Максіма Лужаніна і Максіма Танка (злева направа) на возеры Нарач

Кніга Вацлава Ластоўскага “Гісторыя беларускай (крыўскай) кнігі”, падораная Максіму Танку ў 1938 годзе.

22.04.2013




© "Міністэрства культуры Рэспублікі Беларусь", 2009-2013
© Распрацоўшчык ТAA "НВФ "IНЕАК", 2009