Дзяржаўны
каталог Музейнага фонду
Рэспублікі Беларусь
Навіны музейнага жыцця  /  Музейныя вандроўкі. Музей гісторыі Клеччыны

Музейныя вандроўкі. Музей гісторыі Клеччыны


       На паўднёвым захадзе ад Мінска, там, дзе праз раўніну сыходзяцца Беларуская града і Прыпяцкае Палессе, знаходзіцца маляўнічы Клецкі край. Там жывуць людзі розных нацыянальнасцей, з рознымі інтарэсамі і прыхільнасцямі, яднае якіх неабыякаваць да сваёй зямлі і яе гісторыі. Прыкладам таму Музей гісторыі Клеччыны.
       Першыя прапановы аб арганізацыі ў Клецку гісторыка-краязнаўчага музея былі зроблены энтузіястамі яшчэ напрыканцы 1950-х гадоў. Ініцыятарамі сталі супрацоўнік міліцыі Васіль Абрамовіч, настаўнік геаграфіі Дарафей Чорны і дырэктар Клецкай школы Анатоль Фінскі. Матэрыялы збіраліся школьнікамі, сябрамі таварыства “Юны краязнаўца”, падчас турыстычных паходаў і вандровак па раёну. У 1961 г. у Клецкай школе была адкрыта першая музейная экспазіцыя. Праз нейкі час побач са школай сіламі вучняў пачалося будаўніцтва асобнага памяшкання для музея, узорам для якога стаў паляўнічы домік з палацавага комплекса Румянцавых-Паскевічаў у Гомелі. Будаўніцтва ішло амаль 10 гадоў. 1 верасня 1979 г. музей прыняў першых наведвальнікаў. 
        Наведаўшы музей сёння, можна пазнаёміцца з рознымі старонкамі гісторыі края - часамі старажытнасці і сярэднявечча, перыядам, калі Клеччына належала Боне Сфорцы, а затым Радзівілам, развіццём мястэчка Клецк у часы Расійскай Імперыі, трагічнымі падзеямі ХХ ст., а таксама з культурай і традыцыямі розных народаў - беларусаў, яўрэяў, рускіх, палякаў, татар, якія здаўна пражываюць на Клеччыне.

        На віртуальнай выставе прадстаўлены некаторыя з найбольш цікавых прадметаў са сбора музея:

        падковападобная фібула Х ст., знойдзеная падчас палявых даследванняў былога Вакольнага горада ў 1986 г. (кіраўнікі работ Т.Бубенька і В.Пазднякоў). Фібул такога віда на тэрыторыі Старажытнай Русі на дадзены момант больш не выяўлена.

       пярсценак-пячатка з выявай грыфона адносіцца да найбольш унікальных археалагічных знаходак Клецка і з\'яўляецца сігнетам-пячаткай, якія насілі прадстаўнікі вышэйшай знаці і духавенства. Падобныя сігнеты служылі своеасаблівым пасведчаннем асобы. Пярсцёнак знойдзены падчас палявых даследванняў былога Вакольнага горада ў 1986 г. (кіраўнікі работ В.Пазднякоў, Т.Бубенька). Аналагічны пярсцёнак знойдзены ў Пскове. Вобраз грыфона атрымаў на Русі шырокае распаўсюджанне і служыў, сярод іншага, сімвалам моцнай княжацкай улады.

       фігурка воіна, якая выкарыстоўвалася хутчэй за ўсё для ўпрыгожвання мэблі

       рукапісны Каран 1817 г., які нагадвае пра традыцыі татар, што пражываюць на Клецкай зямлі 

      царкоўныя харугвы:
      з в. Пласкавічы - была перададзена Міхалам і Палашкай Крыцкімі ў мясцовую царкву, верагодна, прыхадскую - Святых апосталаў Пятра і Паўла ў в. Грыцэвічы
      з в. Блячын (цяпер в. Садовая), магчыма, знаходзілася ў Блячынскай Іаана-Прадцечынскай царкве, разбуранай у 1965 г.

      копія фатаграфіі Яўхім Фёдаравіча Карскага - выдатнага беларускага філолага, палеографіа і этнографа, які вандраваў па Клеччыне падчас працы над першым томам сваёй трохтомнай працы "Беларусы"

     гадзіннік, выраблены ў г.Клецку ў майстэрні Янкеля Карпацкага - габрэя, які пражываў у горадзе ў 1930-я гг., меў сваю прыватную гадзіннікавую майстэрню, дзе збіраў падобныя гадзіннікі з дэталяў, якія паступалі са Швейцарыі з фірмы "Fortuna"


29.05.2013




© "Міністэрства культуры Рэспублікі Беларусь", 2009-2013
© Распрацоўшчык ТAA "НВФ "IНЕАК", 2009