Дзяржаўны
каталог Музейнага фонду
Рэспублікі Беларусь
Навіны музейнага жыцця  /  Музейныя вандроўкі. Гомельскі палацава-паркавы ансамбль

Музейныя вандроўкі. Гомельскі палацава-паркавы ансамбль


     Горад Гомель - сталіца беларускага Палесся - найбольш інтэнсіўна стаў развівацца з канца XVIII ст., калі быў падораны генералу-фельдмаршалу П.А. Румянцаву-Задунайскаму. Ён і пабудаваў галоўную архітэктурную знакамітасць горада – Гомельскі палац. Ужо ў часы Паскевічаў – наступных уладальнікаў – у палацы пачалі фарміравацца цікавыя калекцыі мемарыяльных рэчаў фельдмаршала І.Ф. Паскевіча, жывапісных і скульптурных твораў, мастацкага шкла і фарфора і шмат іншых, якія пасля сталі асновай Гомельскага гісторыка-мастацкага музея, заснаванага ў 1919 г., папярэдніка сучаснага музейнага комплекса “Гомельскі палацава-паркавы ансамбль”. 
    Патрапіўшы сюды сёння можна адчуць атмасферу стогадовай даўніны, у першую чаргу, дзякуючы прагулкам па адноўленых пакоях палаца і парку. Таксама можна зазірнуць у Дамовую царкву, а даведацца пра дзейнасць і лёсы ўладальнікаў можна з гісторыка-мемарыяльнай экспацізыі, размешчанай у вежы. Шматлікія цікавосткі, што захоўваюцца у музейных калекцыях – а гэта і археалагічныя помнікі, і ўзоры ўнікальнага стараабрадніцкага і народнага іканапісу, і прадметы з унікальнага збора мастацкай бронзы, і мемарыяльныя рэчы дзеячаў ХХ і ХХІ стагоддзя – можна пабачыць і ў палацавых інтэр’ерах і на выставах. 
     Як і ў ХІХ стагоддзі палац сёння яшчэ і духоўна-эстэтычны цэнтр, дзе пастаянна праводзяцца “Музычны салон”, разнастайныя канцэрты, літаратурныя, тэатральныя і іншыя тэматычныя вечарыны, а таксама сустрэчы з цікавымі асобамі.

    На выставе прадстаўлены некаторыя з найбольш цікавых прадметаў са збора музея:

    Ляпная пасудзіна сярэднедняпроўскай культуры эпохі бронзы, якая была знойдзена падчас археалагічных раскопак курганнага могільніка каля в. Хадосавічы Рагачоўскага раёна Гомельскай вобласці (кіраўнік І.І. Арцёменка). Арнамент на пасудзіне з’яўляецца прыкладам касмалагічных поглядаў ранніх земляробаў.

    Медная літая сякера-пальштаб эпохі бронзы, якая была выпадкова знойдзена каля вёскі Прыбар Гомельскага раёна Гомельскай вобласці. Рэдкі ўзор металічных вырабаў бронзавага века імпартнага паходжання.

    Вочкавідная падвеска эпохі бронзы, вырабленая з меднага дроту, якая хутчэй за ўсё была рытуальным упрыгажэннем. Была знойдзена падчас раскопак курганнага могільніка сярэднедняпроўскай культуры ў в. Хадосавічы Рагачоўскага раёна Гомельскай вобласці (кіраўнік І.І. Арцёменка).

   Касцяны гарпун – рэдкі ўзор цалкам захаваўшайся рыбалоўнай снасці канца каменнага – пачатку бронзавага века. Быў выпадкова знойдзены каля в. Отар Чачэрскага раёна Гомельскай вобласці.

   Медны рыбалоўны кручок эпохі бронзы, выпадкова знойдзены ў Веткаўскім раёне Гомельскай вобласці.

   Тэтрахалк – манета Баспорскага царства, адчаканеная ў час кіравання Левкона ІІ, верагодна, у горадзе Панцікапеі (зараз Керч). На аверсе – галава безбародага саціра ў вянку ўлева і надчаканка ў выглядзе 12-канцовай зоркі. На рэверсе - галава льва ўлева, унізе асяцёр, надчаканка “Гарыт” (футляр для лука і стрэл). Значэнне надчаканак дагэтуль застаецца дыскусійным.

   Віслая пячатка эпохі Кіеўскай Русі. На ліцавым баку выява Св. Георгія ў поўны рост з кап’ём і надпіс “АГІО ГЄОР”. На адваротным баку знак Рурыкавічаў – трызубец. Найбольш верагодны ўладальнік – Юры (Георгій) Яраславіч. Была выпадкова знойдзена каля в. Залатуха Калінкавіцкага раёна Гомельскай вобласці. Гэта першая знаходка віслай пячаткі са знакам Рурыкавічаў на Беларусі.

   Двухбаковы крыж і каменны абразок з выявай Ісуса Хрыста

   Жалезны плоскі чарашковы наканечнік стралы, на абодвух баках пялёстка якога працарапаны знак Рурыкавічаў – трызубец. Унікальны выпадак знаходкі прадмета ўзбраення са знакам Рурыкавічаў. Знойдзены падчас раскопак Гомеля пад кіраўніцтвам О.А. Макушнікава ў 1987 г.

   Узнагародная шабля “За храбрость”, якая належала І.Ф. Паскевічу. Уздоўж клінка па абодвух баках змешчаны назвы крэпасцяў, у штурме якіх прымаў удзел І.Ф. Паскевіч.

   Жывапісныя работы:
Штурм крэпасці Ахалцых” Антона Сухадолскага. Знаходзілася ў калекцыі Паскевічаў.
Від Гомельскага палаца” Адама Ідзкоўскага 


26.06.2013




© "Міністэрства культуры Рэспублікі Беларусь", 2009-2013
© Распрацоўшчык ТAA "НВФ "IНЕАК", 2009