Дзяржаўны
каталог Музейнага фонду
Рэспублікі Беларусь
Навіны музейнага жыцця  /  Музейныя вандроўкі. Ушацкі музей народнай славы імя Героя Савецкага Саюза У. Е. Лабанка

Музейныя вандроўкі. Ушацкі музей народнай славы імя Героя Савецкага Саюза У. Е. Лабанка


     Ушаччына – край рэк, азёр, лясоў і палёў, край, які людзі абралі для жыцця яшчэ ў каменным веку, край, дзе ўсё ішло сваім парадкам без вялікіх патрасенняў доўгія часы, край, у гісторыі якога яскравую старонку пакінула Вялікая Айчынная вайна, бо з 1943 года гэта быў партызанскі край – цэнтр партызанскай зоны, часткова вызваленай ад акупацыйных войскаў. Таму не дзіўна, што Ушацкі музей народнай славы, які знаёміць з гісторыяй края, носіць імя Героя Савецкага Саюза Уладзіміра Лабанка – кіраўніка ваенна-аператыўнай группы, што каардынавала дзеянні атрадаў на тэрыторыі партызанскай зоны.
      Музей быў створаны ў 1969 годзе і ўжо праз год у 1970 быў адкрыты для наведвальнікаў. Мастацкае афармленне музея – панно на фасадзе, манументальныя роспісы вестыбюля – адразу настройвае на асноўныя тэмы, адлюстраваныя ў музеі – дзейнасць партызан у краі, стварэнне партызанскай зоны, барацьба і прарыў падчас карных аперацый немцаў увосень 1943 г. і вясной 1944 г. Гэтыя тэмы ў ваенна-гістарычнай экспазіцыі паказаны праз шматлікія фотаздымкі, дакументы, асабістыя рэчы, зброю ўдзельнікаў вайны, партызанскія газеты і лістоўкі, баявыя трафеі. Асабліва цікавай ў музеі з\'яўляецца «Партызанская карцінная галерэя», часткова аформленая ў выглядзе зямлянкі штаба партызанскай брыгады, дзе ўпершыню прадстаўляліся малюнкі і партрэты партызан, створаныя мастакамі М.І. Абрыньбай і М.Ц. Гуціевым яшчэ падчас вайны.

      На выставе прадстаўлены некаторыя з найбольш цікавых прадметаў са збора музея:

       Графічныя творы мастакоў-партызан брыгады «Дубава»:
        «Саўчанка – разведчык» і «Абстрэл эшалона» Абрыньбы Мікалая Іпалітавіча
        «З гарматы па цягніку», «Атрад у паходзе» і «Адрад пастроены» з серыі «Партызанскія будні» Мікалая Цімафеевіча Гуціева

       Кнігі беларускіх паэтаў, што нарадзіліся на Ўшаччыне, з дароўнымі надпісамі аўтараў музею:
       «Аповесці» Васіля Быкава
       «Рум» Рыгора Барадуліна
       «Калі ласка» Петруся Броўкі
       «Вянцы зруба» Еўдакіі Лось

       Кніга камандзіра Лепельскай партызанскай брыгады імя І.В. Сталіна, кіраўніка аператыўнай групы Беларускага штаба партызанскага руху па Полацка-Лепельскай партызанскай зоне, палкоўніка Уладзіміра Елісеевіча Лабанка «У баях за Радзіму» 


02.08.2013




© "Міністэрства культуры Рэспублікі Беларусь", 2009-2013
© Распрацоўшчык ТAA "НВФ "IНЕАК", 2009