Дзяржаўны
каталог Музейнага фонду
Рэспублікі Беларусь
Навіны музейнага жыцця  /  Выстава аднаго дня. Яблычны Спас

Выстава аднаго дня. Яблычны Спас


19 жніўня – Другі або Вялікі Спас. У хрысціянскай традыцыі гэта дзень Праабражэння Гасподняга, у народнай да яго прымеркаваны шматлікія абрады.
Вялікі Спас асабліва шануецца ў народзе. Яго яшчэ называюць яблычным, так як лічыцца, што яблыкі да гэтага дня цалкам паспяваюць і іх можна есць. У гэты дзень у храмах асвячалі яблыкі і іншыя плады. Была таксама традыцыя пакідаць асвечаныя яблыкі на магілах блізкіх. Да Спаса яблыкі есць забаранялася, асабліва жанчынам, у якіх памерлі дзеці. Па народным павер\'і, у гэты дзень Бог (або Божая Маці) раздаюць на нябёсах ўсім памерлым дзеткам па яблычку, а таму дзіцяці, чыя маці паспрабавала яблык раней пакладзенага, пачастунку не дастанецца. У гэты дзень таксама асвячалі каласы новага ўраджаю, казалі «Спас – дастане хлеба ў нас», а таксама мёд, які напярэдадні свята даставалі з вулляў.
Па народных прыметах, гэты дзень азначае наступ восені і ператварэнне прыроды. Прынята лічыць, што ночы пасля 19 жніўня становяцца нашмат халадней. Таксама Спас лічыўся днём адлёту буслоў, з чым звязаны прыкметы, па якіх прагназавалі надвор\'е на год: калі буслы рыхтаваліся да адлёту за тыдзень да Спаса, чакалася, што зіма прыйдзе раней і будзе марозная, а вясна цёплая, а калі пасля Спаса – восень будзе цёплая, зіма позняя, а вясна халодная. Адлёт буслоў нагадваў пра набліжэнне зімы, што адбілася і ў прымаўках: «Спас - лета шась!», «Спас – бяры руковицы ў запас».

На выставе прадстаўлены прадметы з Брэсцкага абласнога краязнаўчага музея, Гомельскага палацава-паркавага ансамбля, Гісторыка-культурнага музея-запаведніка «Заслаўе», Магілёўскага абласнога краязнаўчага музея імя Е.Р. Раманава, Магілёўскага абласнога мастацкага музея імя П.В. Масленікава.


19.08.2013




© "Міністэрства культуры Рэспублікі Беларусь", 2009-2013
© Распрацоўшчык ТAA "НВФ "IНЕАК", 2009