Адстойнік для малака

Ганчарны выраб, прызначаны для эфектыўнага аддзялення вяршкоў падчас працэсу сепарыравання малака. Тулава пасудзіны мае цыліндрычную форму з плоскім дном, шырокім вусцем, дзвюма ручкамі, акенцам для назірання і невялікім выступам з адтулінай для зліву ў прыдоннай частцы. У свой час Глыбокае з’яўлялася адным з адносна буйных ганчарных цэнтраў заходняй часткі Паазер’я, дзе сярод іншых узораў посуду ў нязначнай колькасці вырабляліся і адстойнікі для малака. Дадзены адстойнік створаны ў 1950-х гадах вядомым глыбоцкім майстрам Леанідам Васільевічам Скрагай. Падобны выраб выкарыстоўваўся наступным чынам: запоўнены малаком адстойнік выносілі ў халоднае месца або ставілі ў вядро з халоднай вадой. Праз пэўны час яго прыносілі ў хату і, адкрыўшы адтуліну ў прыдоннай частцы, злівалі абястлушчанае малако (слой вяршкоў пры гэтым заставаўся зверху). Дзякуючы адмысловаму акенцу для назірання можна было ўлавіць момант, калі ў адстойніку заставаліся толькі вяршкі (адрозніваліся па колеру), якія зліваліся ў асобную пасудзіну.

D - 15 см