Дыван маляваны «Букет кветак»

Маляваны дыван беларускага мастака Язэпа Драздовіча. Маляваныя дываны вядомы на Беларусі з канца XIX стагоддзя, але найбольшае іх распаўсюджванне адбылося ў 1930 – 1950-х гадах, калі вялася інтэнсіўная адбудова вёскі. Насценныя дываны ў гэты час былі галоўным упрыгажэннем інтэр’еру сялянскай хаты. Маляваныя дываны Язэпа Драздовіча, большасць з якіх былі створаны на Глыбоччыне ў 1930-я гады, адрозніваюцца непаўторнымі ўзорамі і сюжэтамі, і з’яўляюцца вялікай культурнай каштоўнасцю нашай краіны. Цэнтральную частку гэтага дывана займае вялікі рознакаляровы букет кветак. Абапал яго адлюстраваны буйныя кветкі з бела-сінімі і бела-чырвонымі пялёсткамі. Над букетам змешчана гірлянда з чырвона-ружовых кветак. Вуглы дывана ўпрыгожваюць асобныя кветкавыя кампазіцыі. Акаймоўка малюнка зроблена ў выглядзе характэрнай для дываноў Язэпа Драздовіча хвалістай стужкі.