Гадзіннік “Gustav Becker”

Механічны падлогавы гадзіннік маркі “Gustav Becker”. Мае драўляны, аздоблены дэкорам корпус, унутры якога змешчаны гадзіннікавы механізм з маятнікам і двума гірамі, а таксама гонг тыпу “Trio Gong”. На цыферблаце добра праглядаецца фірменнае кляймо ў выглядзе якара з каронай і літар “G” і “B” – ініцыялаў Густава Бекера – вядомага нямецкага майстра, фабрыканта і заснавальніка аднайменнай маркі гадзіннікаў. Паколькі на гадзіннікавым механізме адсутнічае серыйны нумар, можна меркаваць, што створаны ён быў не раней 1926 года, калі кампанія-вытворца “Vereinigte Freiburger Uhrenfabriken” спыніла нумарацыю сваёй прадукцыі. Месцам стварэння дадзенага гадзінніка верагодна з’яўляецца сілезскі горад Фрайбург (сучасная назва – Свебадзіцы).