Гадзіннік майстра Залкінда

Механічны гадзіннік з будзільнікам работы глыбоцкага майстра М. Залкінда. Акрамя звычайнага гадзіннікавага механізму, прылада мае механізм званка, які прыводзіцца ў рух асобнай спружынай і дзейнічае па прынцыпу завадной цацкі. Цыферблат будзільніка адрозніваецца асаблівай інфарматыўнасцю – майстар паклапаціўся пра тое, каб на ім былі ўказаны яго прозвішча, месца зборкі, гатунак і нават гарантыя. Спіс уладальнікаў прамысловых і гандлёвых прадпрыемстваў мястэчка Глыбокае за 1923 год паведамляе, што майстар гадзіннікаў Залкінд працаваў па адрасу: вул. Замкавая, 26 (сучасная вул. Леніна). Па некаторых звестках, усе неабходныя дэталі да будучых гадзіннікаў ён закупляў у Варшаве, а ў сваёй глыбоцкай майстэрні ўжо ажыццяўляў іх непасрэдную зборку.