Дыван маляваны «Кветкі»

Маляваны дыван беларускага мастака Язэпа Драздовіча. Маляваныя дываны вядомы на Беларусі з канца XIX стагоддзя, але найбольшае іх распаўсюджванне адбылося ў 1930 – 1950-х гадах, калі вялася інтэнсіўная адбудова вёскі. Насценныя дываны ў гэты час былі галоўным упрыгажэннем інтэр’еру сялянскай хаты. Маляваныя дываны Язэпа Драздовіча, большасць з якіх былі створаны на Глыбоччыне ў 1930-я гады, адрозніваюцца непаўторнымі ўзорамі і сюжэтамі, і з’яўляюцца вялікай культурнай каштоўнасцю нашай краіны. Цэнтральную частку гэтага дывана займае букет кветак. З левага і правага бакоў маюцца выявы кветак з ружова-белымі і чырвона-белымі пялёсткамі. Ніжэй букета нанесены раслінны арнамент. Вышэй - вянок з ружовых кветак і белых рамонкаў. У ніжніх і верхніх вуглах дывана маюцца выявы фіялак. Акаймоўка маляванкі ў выглядзе геаметрычнага арнаменту.