Дахоўка з маёнтка Азярцы

Керамічны выраб для пакрыцця даху, створаны ў маёнтку Азярцы ў пачатку ХХ стагоддзя. Уяўляе сабой так званую штампаваную дахоўку прамавугольнай формы з прафіляванай паверхняй, зробленую машынным спосабам. Мае заводскія клеймы, адно з якіх (“OZIERCE”) указвае на маёнтак, а другое (“S.OSKIERKA”) – на ўладальніка маёнтка Сігізмунда Аскерку (сям’я Аскеркаў валодала фальваркам Азярцы да верасня 1939 года). Тым не менш, не маецца дакладных пацвярджэнняў адносна выпуску дадзенага дахавага матэрыялу непасрэдна ў Азярцах, выраб мог весціся і ў іншым населеным пункце маёнтка. Верагодна вытворчасць дахоўкі ў маёнтку Азярцы не мела масавага характару: на тэрыторыі Глыбоцкага раёна яе выкарыстанне зафіксавана толькі ў некалькіх месцах.