Дыван маляваны «Замак на беразе возера»

Маляваны дыван беларускага мастака Язэпа Драздовіча. Жывапісны твор мае характэрную для яго работ пабудову кампазіцыі: цэнтр займае сюжэтны малюнак (начны краявід з замкам і двума белымі лебедзямі), аздоблены абмалёўкай з кветак. Маляваныя дываны вядомы на Беларусі з канца XIX стагоддзя, але найбольшае іх распаўсюджванне адбылося ў 1930 – 1950-х гадах, калі вялася інтэнсіўная адбудова вёскі. Насценныя дываны ў гэты час былі галоўным упрыгажэннем інтэр’еру сялянскай хаты. Маляваныя дываны Язэпа Драздовіча, большасць з якіх былі створаны на Глыбоччыне ў 1930-я гады, адрозніваюцца непаўторнымі ўзорамі і сюжэтамі, і з’яўляюцца вялікай культурнай каштоўнасцю нашай краіны.