Гадзіннік камінны «Леанарда да Вінчы»

Гадзіннік з анкерным механізмам устаноўлены на чатырох ножках, на фасадзе - літыя, накладныя, у выглядзе гнуткіх лісткоў і завіткоў, на задняй панэлі - геаметрычныя. Аснаванне прамавугольнае, гладкае, ніжняя частка фасада дэкараваная «хваляй», пальметамі і стылізаванымі лістамі аканта. Над аснаваннем уздымаецца стылізаваная скала ў якую ўстаноўлены гадзіннік з круглым цыферблатам, рымскімі лічбамі і двумя стрэлкамі. Цыферблат па акружнасці ўпрыгожаны арнаментам з рэльефнымі дыяганальнымі насечкамі паміж палосамі «жамчужных» арнаментаў. Над цыферблатам сядзіць мужчына ў касцюме эпохі Адраджэння, які ў левай руцэ трымае планшэт з аркушам паперы, правай рукой паказвае на папку для эскізаў, якія з'яўляюцца атрыбутамі мастака. Верагодна, бронзавая скульптура адлюстроўвае генія эпохі Адраджэння, вялікага італьянскага мастака, Леанарда да Вінчы (1452 - 1519).