Кафля з зааморфным малюнкам

Тэракотавая керамічная плітка для абліцоўкі печы, як мяркуецца, мясцовай вытворчасці. Вонкавая пласціна кафлі дэкарыравана рэльефным зааморфным малюнкам (верагодна, выявай льва) і выгнута ўнутр; рамкі па краю пласціны няма. Да донца вонкавай пласціны прымацавана румпа, якая надае адваротнаму боку кафлі выгляд адкрытай каробкі. З дапамогай гэтай румпы, у баках якой зроблены дзве адтуліны, кафля мацавалася да печы. У Глыбокім сустракаецца таксама і паліваная кафля – кафля пакрытая глазурай, але тэракотавая была безумоўна таннейшая і прасцейшая ў вытворчасці. Для вырабу вонкавай пласціны выкарыстоўвалася адмысловая драўляная форма, румпа ж выраблялася асобна на ганчарным крузе. На апошнім этапе канчаткова сфармаваная кафля абпальвалася ў горне.