Кафля паліваная з зааморфным малюнкам

Керамічная плітка для абліцоўкі печы, як мяркуецца, мясцовай вытворчасці. Датуецца канцом XVI – першай паловай XVII стагоддзяў. Вонкавая пласціна кафлі пакрыта зялёнай палівай і дэкарыравана рэльефным зааморфным малюнкам (верагодна, выявай льва), выгнута ўнутр; рамкі па краю пласціны няма. Да донца вонкавай пласціны прымацаваны рэшткі румпы, якая надавала адваротнаму боку кафлі выгляд адкрытай каробкі. З яе дапамогай кафля мацавалася да печы. Для вырабу вонкавай пласціны выкарыстоўвалася адмысловая драўляная форма, румпа выраблялася асобна на ганчарным крузе. На апошнім этапе канчаткова сфармаваная кафля абпальвалася ў горне. Асаблівую цікавасць уяўляе сабой малюнак на вонкавай пласціне кафлі, які, хутчэй за ўсё, адлюстроўвае льва. Прынамсі, менавіта некаторыя характэрныя рысы гэтага драпежніка (пышная львіная грыва, кіпцюрастыя лапы, тонкі хвост з “пэндзлікам”) паспрабаваў перадаць аўтар малюнка.