Кафля з выявай герба ордэна кармелітаў босых

Тэракотавая керамічная плітка для абліцоўкі печы, як мяркуецца, мясцовай вытворчасці. Датуецца сярэдзінай XVII стагоддзя і змяшчае на вонкавай пласціне выяву герба каталіцкага манаскага ордэна кармелітаў босых: на ўвянчаным каронай шчыце адлюстраваны стылізаваная гара Кармель з крыжам і тры зоркі. Гара Кармель (горны масіў на паўночным захадзе сучаснага Ізраіля) прысутнічае на гербе невыпадкова – менавіта на яе схілах у эпоху крыжовых паходаў склалася манаская суполка кармелітаў; тры зоркі могуць сімвалізаваць як тры манаскія зарокі (цнота, паслушэнства, беднасць), так і тры багаслоўскія дабрачыннасці (вера, надзея, любоў). На жаль, верхняя частка кафлі захавалася дрэнна, з-за чаго амаль не бачны яшчэ адзін элемент герба – рука, якая трымае вогненны меч (згадка пра перамогу прарока Іллі над паганскімі жрацамі на гары Кармель). Дадзеная кафля, відавочна, была выраблена адмыслова для манастырскіх печаў кляштара кармелітаў босых, актыўнае будаўніцтва якога вялося ў Глыбокім ў сярэдзіне XVII стагоддзя. Гэты буйны кляштар, гісторыя якога скончылася ў 1860-х гадах, адыграў важную ролю ў развіцці Глыбокага.