Карта Глыбоцкай акругі

Геаграфічная карта Глыбоцкай акругі (гебіта) часоў Другой сусветнай вайны маштабам 1:300 000. У 1941 – 1944 гадах Глыбоцкая акруга ўваходзіла ў склад Генеральнай акругі “Беларусь”; яе тэрыторыя распаўсюджвалася амаль на ўвесь захад сучаснай Віцебскай вобласці. Датаваная 15 сакавіка 1943 года, карта паказвае размяшчэнне перапрацоўчых прадпрыемстваў Цэнтральнага гандлёвага таварыства “Усход” (ЦГТ “Усход”) у Глыбоцкай акрузе. Згаданае таварыства з’яўлялася нямецкай арганізацыяй, якой былі даручаны нарыхтоўка, захоўванне і перавозка сельскагаспадарчай прадукцыі, а таксама кіраванне прадпрыемствамі харчовай прамысловасці на акупіраванай частцы Савецкага Саюза. На карце абазначаны асноўныя шляхі зносін, межы раёнаў, а галоўнае – усе населеныя пункты акругі, дзе меліся прадпрыемствы, падпарадкаваныя ЦГТ “Усход”, з указаннем іх спецыялізацыі (у тым ліку суб’екты гаспадарання, знішчаныя партызанамі). Пасля вызвалення Глыбокага, карта ў якасці ваеннага трафея трапіла да Мікалая Арцёмавіча Рашэтнікава, які з ліпеня 1944 года па жнівень 1946 года займаў пасаду першага сакратара Глыбоцкага райкама партыі.