Жывапіс «Далёкая краіна»

Жывапіснае палатно беларускага мастака Язэпа Драздовіча. Карціна напісана ў блакітна-карычнева-зялёных танах і ўяўляе сабой пейзаж-фантазію з некаторымі італьянскімі рысамі (звяртае на сябе ўвагу лодка, падобная на традыцыйную венецыянскую гандолу). На пярэднім плане бачна постаць вандроўніка, пад якім аўтар, магчыма, разумее сябе. Асабліва ўражваюць створаныя ўяўленнем мастака велічныя архітэктурныя помнікі-храмы. Усе элементы карціны складаюцца разам у прывабны вобраз цудоўнай далёкай краіны, які заклікае гледача да падарожжаў. Дзіўнае ўяўленне Язэпа Драздовіча адкрывае для нас хараство раней нязнаных куткоў. Ды і для самога творцы, які атрымаў ад нашчадкаў мянушку “вечны вандроўнік” гэта карціна мела, магчыма, асаблівае значэнне.