Касанэ

Прамавугольнай формы з адкідным прамым векам на металічных завесах. Вонкавы фасад складаецца з шырокага прафіліраванага карніза з разным фрызам, прафіліраванай разной панэлі з карынфскімі калонамі і ніжняга фрыза, дэкараванага арнаментам з оваў. Верхні фрыз дэкараваны раппортам з элементаў расліннага арнамента і пальмет, у цэнтры - галоўка херувіма, на канцах фрыза аздоба пірамідальнай формы, У цэнтры прафіліраванай панэлі выявы міфалагічных персанажаў: у авальным медальёне - сюжэт «выкраданне Ганімеда Зеўсам», Зеўс - у абліччы арла. Абапал медальёна - нерэіды, якія сядзяць на фантастычных дэльфінах. На веку ў двух авальных картушах выразаны манаграмы - лацінскія літары гатычным шрыфтам, абрамленыя лаўровымі вянкамі. Дзве пярэднія ножкі ў выглядзе дыскаў, дзве заднія - прамавугольнага сячэння.