Кларнет

Самаробны драўляны духавы музычны інструмент, створаны ў другой палове 1960-х гадоў Асоўскім Аляксандрам Ціханавічам – майстрам-самавукам з вёскі Мосар Глыбоцкага раёна. Захоўваецца ў асобным футляры ў разабраным выглядзе; канструкцыя кларнета складаецца з пяці частак: муштук, бочачка, верхняе калена, ніжняе калена і раструб. Са слоў сваякоў, А. Ц. Асоўскі праходзіў тэрміновую ваенную службу ў складзе ваеннага аркестра, што, разам з любоўю да музыкі, верагодна, і паўплывала на яго рашэнне зрабіць уласны музычны інструмент. Драўляныя элементы кларнета вытачаны з моранага дуба, маюць чорны колер; выразна бачны малюнак гадавых кольцаў. Складаны клапанна-кальцавы механізм інструмента быў адліты з серабра, атрыманага шляхам пераплаўкі манет. Футляр звонку чорны, знутры абабіты чырвоным і бірузовым аксамітам.