Кніга «Гісторыя беларускай (крыўскай) кнігі»

Друкаванае выданне беларускага грамадскага і палітычнага дзеяча, гісторыка, філолага і літаратуразнаўцы Вацлава Ластоўскага. Кніга была выдадзена ў 1926 годзе ў друкарні Сакалоўскага і Лана. Месцам выдання стаў горад Коўна (Каўнас) у Літоўскай Рэспубліцы. Гэты вялікі і добра ілюстраваны твор, у якім праведзены агляд вялікай колькасці рукапісных кніг, грамат і старадрукаў з пачатку зараджэння беларускага пісьма да XIX стагоддзя, стаў адной з найважнейшых навуковых прац Вацлава Ластоўскага. Як адзначае сам аўтар, мэта гэтай кнігі заключаецца ў тым, каб паказаць, што пісьменства беларускага народу бярэ пачатак яшчэ ў Х стагоддзі, а па багаццю помнікаў можа прэтэндаваць на першае месца сярод усходнеславянскіх народаў.