Кніга «Знахар»

Друкаванае выданне польскага пісьменніка беларускага паходжання Тадэвуша Даленгі-Мастовіча. Кніга змяшчае раман “Знахар”, упершыню апублікаваны ў 1937 годзе і ў тым жа годзе экранізаваны. Выдадзена ў 1938 годзе ў Познані друкарняй “Drukarnia Polska S.A. w Poznaniu”; багата ілюстравана кадрамі з аднайменнага фільма. Тадэвуш Даленга-Мастовіч нарадзіўся 23 верасня 1900 года ў мястэчку Глыбокае ў сям’і мясцовага юрыста. У пачатку 1920-х гадоў пераехаў у Варшаву і заняўся журналісцкай і літаратурнай дзейнасцю. У 1930-х гадах стварыў шэраг буйных літаратурных твораў, якія прынеслі аўтару шырокую вядомасць, зрабіўшы яго самым папулярным пісьменнікам міжваеннай Польшчы. Раман “Знахар”, падзеі якога адбываюцца ў Заходняй Беларусі, з’яўляецца адной з найбольш значных работ пісьменніка.