Дыван «Юнак і дзяўчына»

Тканы шарсцяны насценны дыван ручной вытворчасці. Выраб адрозніваецца надзвычай багатым дэкорам, які спалучае раслінны арнамент, кветкавыя кампазіцыі і сюжэтны малюнак. Раслінны арнамент, складзены пераважна з пладоў яблыні, грушы і вішні, пралягае па краях дывана, утвараючы своеасаблівую рамку. Цэнтральную частку дывана займае малюнак з гарэзлівым сюжэтам, што адлюстроўвае юнака і дзяўчыну, якія збіраюць вішні. Абапал згаданага малюнка змешчаны пышныя кветкавыя кампазіцыі, а таксама невялікія дзявочыя фігуркі з кветкамі ў руках. Дыван створаны на ткацкім станку нестандартнага памеру, які забяспечыў вырабу даволі вялікую шырыню; таксама звяртае на сябе ўвагу высокі ўзровень майстэрства стваральніка дывана. Падобныя дываны часта выкарыстоўваліся ў вясельнай абраднасці, на што намякае як сімволіка расліннага арнаменту, так і сюжэт яго цэнтральнага малюнка. Дапушчальна меркаваць, што імёны, вытканыя на дыване (“Анна Кириловна и Михаилъ Кириловичъ Скорцеско”), належалі менавіта маладым.