Мухалоўка

Шкляная мухалоўка. Старадаўні прадмет побыту, адмысловае прыстасаванне для барацьбы з мухамі. Уяўляе сабой пасудзіну шарападобнай формы з вузкім кароткім рыльцам, дно якой мае лейкападобную адтуліну. Ножкі мухалоўкі забяспечвалі зазор паміж адтулінай і паверхняй стала, на якім стаяла пасудзіна. У паглыбленне вакол згаданай адтуліны заліваўся квас, сіроп, сываратка малака ці іншая прывабная для мух вадкасць, пасля чаго рыльца закрывалі коркам. Маглі выкарыстоўваць таксама і мыльны раствор, але, у такім выпадку, пад адтулінай мухалоўкі патрэбна было паставіць асобную пасудзіну з прынадай (напрыклад, кіслае малако з кавалкамі хлеба), падымаючыся ад якой муха трапляла ў пастку. Патрапіўшы ў мухалоўку праз адтуліну знізу і не маючы магчымасці выбрацца вонкі, насякомыя аказваліся ў вадкасці і гінулі. Верхняя адтуліна дапамагала зручна ачысціць гэта цікавае прыстасаванне. Лічыцца, што падобныя шкляныя мухалоўкі з’явіліся ў канцы ХІХ стагоддзя і ўжо ў хуткасці атрымалі шырокае распаўсюджанне. Працягвалі выкарыстоўвацца яны пэўны час і ў другой палове ХХ стагоддзя.