Паштоўка «Гандлёвы рад. Дом Падноса»

Паштоўка выдавецтва Л. Я. Рома з відам забудовы вуліцы Замкавай мястэчка Глыбокае. З дапамогай каларызацыі – афарбоўкі ўручную асобных участкаў выявы – панарама вуліцы набыла каляровы выгляд. Адваротны бок у адпаведнасці з парадкам, уведзеным з 1904 года, раздзелены вертыкальнай лініяй на дзве часткі: левая палова прызначана для кароткага пісьма, правая – для адраса і маркі. На пярэднім плане фотаздымка, выкарыстанага пры стварэнні паштоўкі, адлюстраваны двухпавярховы будынак (захаваўся да нашага часу), які належаў мясцовай яўрэйскай сям’і Паднос, што згадана і ў назве паштовай карткі. Варта адзначыць, што менавіта ў гэтым доме ў пачатку ХХ стагоддзя знаходзілася выдавецтва Л. Я. Рома і яго кніжная крама, пра што можна меркаваць дзякуючы шыльдам на згаданым будынку.