Анатацыя
Паштоўка варшаўскага выдавецтва Антонія Хадавецкага з відам мястэчка Глыбокае. Улічваючы, што яе адваротны бок прызначаны толькі для адраса і маркі, можна сцвярджаць, што створана яна была да 1904 года, калі, ў адпаведнасці з новым парадкам, на адваротным баку паштовых картак з’явілася месца для кароткага пісьма.
У першую чаргу, паштоўка цікавая тым, што на ёй змешчана адна з найбольш ранніх фатаграфічных выяў Глыбокага. Фотаздымак адлюстроўвае панараму паўночна-ўсходняй часткі мястэчка з касцёлам Святой Тройцы, царквой Раства Прасвятой Багародзіцы і карпусамі былога кляштара кармелітаў босых, утрымліваючы, такім чынам, найкаштоўнейшыя звесткі пра знешні выгляд Глыбокага на рубяжы XIX – XX стагоддзяў.