Паштоўка «Прафесар І. М. Мінскі»

Паштоўка з выявай пісьменніка, публіцыста, аднаго з пачынальнікаў сімвалізму Мікалая Мінскага. Створана ў пачатку ХХ стагоддзя (выдавецтва не пазначана). Адваротны бок у адпаведнасці з парадкам, уведзеным з 1904 года, раздзелены вертыкальнай лініяй на дзве часткі: левая палова прызначана для кароткага пісьма, правая – для адраса і маркі. Мікалай Максімавіч Мінскі (сапраўднае прозвішча – Віленкін) нарадзіўся ў студзені 1855 года ў мястэчку Глыбокае Дзісенскага павета Віленскай губерні. Пакінуў пасля сябе багатую літаратурную спадчыну. Цікавай асаблівасцю музейнага прадмета з’яўляецца той факт, што ініцыялы пісьменніка і былога рэдактара вядомай пад час рэвалюцыі 1905 – 1907 гадоў газеты “Новае Жыццё” на пярэднім баку паштоўкі ўказаны з памылкай (И. М. замест Н. М.).