Паштоўка «Царкоўная плошча»

Паштоўка выдавецтва Л. Я. Рома з відам мястэчка Глыбокае. З дапамогай каларызацыі – афарбоўкі ўручную асобных участкаў выявы – панарама Глыбокага, змешчаная на пярэднім баку паштоўкі, набыла каляровы выгляд. Адваротны бок у адпаведнасці з парадкам, уведзеным з 1904 года, раздзелены вертыкальнай лініяй на дзве часткі: левая палова прызначана для кароткага пісьма, правая – для адраса і маркі. Паштоўка, відавочна, была створана паміж 1908 годам, калі была скончана перабудова касцёла Св. Тройцы, адлюстраванага на ёй, і кастрычнікам 1915 года, калі паштоўка была запоўнена, што вядома па даце пісьма. Адправіў яе з паштовага аддзялення Глыбокага ў Мінск чалавек, які знаходзіўся ў мястэчку праездам, накіроўваючыся на месца далейшай службы.