Прыстасаванне для зняцця абутку

Прыстасаванне для зняцця абутку работы невядомага майстра. Створана ў першай палове ХХ стагоддзя на Глыбоччыне, дзе вядома пад мясцовымі назвамі “сучка” або “сабачка”. Уяўляе сабой драўляную дошку даўжынёй 41 см з адмысловай выемкай-рагацінай на канцы, да якой прымацаваны дзве невялікія ножкі. Асабліва звяртае на сябе ўвагу імкненне майстра зрабіць гэты прадмет хатняга ўжытку не толькі функцыянальным, але і прыгожым. Дошка адрозніваецца плаўнымі, часткова закругленымі контурамі, якія выгінаюцца своеасаблівай “таліяй”; яе паверхня добра адшліфаваная, гладкая. “Сучка” дапамагае зручна і беражліва зняць абутак. Сам працэс быў даволі простым: у выемку ўстаўлялася “пятка” і абцас, пасля чаго другой нагой трэба было наступіць на дошку і, прыціскаючы яе сваёй вагой, адначасова сцягваць абутак. Разувацца трэба было асцярожна, каб выпадкова не адарваць абцас, але дзякуючы размеркаванню нагрузкі па ўсёй “пятцы”, рызыка такога зыходу была невялікай.