Статуэтка «Дзяўчынка з сабачкам»

Фарфоравая статуэтка вытворчасці Палонскага завода мастацкай керамікі. Створана ў другой палове 1950-х – 1960-х гадах па скульптуры мастака і скульптара Святланы Уладзіславаўны Галембоўскай (Болзан). Цэнтральнае месца ў кампазіцыі дадзенага твора, прасякнутага вясёлым, жартаўлівым настроем, займае дзяўчынка, перад якой на задніх лапках стаіць сабачка. На нагу дзяўчынкі абапіраецца цацка. Усе фігуры размешчаны на падстаўцы авальнай формы. Статуэтка ўручную пакрыта паліхромным роспісам. Вытворчасць фарфоравых вырабаў ва ўкраінскім горадзе Палоннае вядома яшчэ з канца XIX стагоддзя. На новы ўзровень яна выйшла пасля пераўтварэння мясцовай арцелі “Керамік” у 1956 годзе ў Палонскі завод мастацкай керамікі. Выкарыстоўваючы работы як уласных мастакоў і скульптараў, так і майстроў Кіеўскага эксперыментальнага кераміка-мастацкага завода (супрацоўніцай якога была С. У. Галембоўская (Болзан)), прадпрыемства з сярэдзіны 1950-х гадоў пачало выпуск шэрага яркіх, выразных персанажаў, да якіх, безумоўна, адносіцца і азначаная “Дзяўчынка з сабачкам”.