Статуэтка «Дзяўчына на каньках»

Фарфоравая статуэтка вытворчасці Палонскага завода мастацкай керамікі. Створана ў другой палове 1950-х – 1960-х гадах па скульптуры мастака і скульптара Аксаны Лявонцьеўны Жнікруп. Кампазіцыя твора ўяўляе сабой па-зімоваму апранутую дзяўчыну на каньках, якая сядзіць на лаўцы. Статуэтка ўручную пакрыта паліхромным роспісам. Асабліва ўражвае жаноцкасць і грацыёзнасць скульптурнага вобраза. Вядома таксама пад назвамі “Фігурыстка” і “На катку”. Вытворчасць фарфоравых вырабаў ва ўкраінскім горадзе Палоннае вядома яшчэ з канца XIX стагоддзя. На новы ўзровень яна выйшла пасля пераўтварэння мясцовай арцелі “Керамік” у 1956 годзе ў Палонскі завод мастацкай керамікі. Выкарыстоўваючы работы як уласных мастакоў і скульптараў, так і майстроў Кіеўскага эксперыментальнага кераміка-мастацкага завода (супрацоўніцай якога была А. Л. Жнікруп), прадпрыемства з сярэдзіны 1950-х гадоў пачало выпуск шэрага яркіх, выразных персанажаў, да якіх, безумоўна, адносіцца і азначаная “Дзяўчына на каньках”.