Талерка

Фарфоравая талерка другой паловы XIX стагоддзя вытворчасці англійскай фірмы “Brown-Westhead, Moore & Co”. Верагодна, з’яўлялася часткай сервізу, аб’яднанага агульнай тэматыкай малюнкаў, прысвечаных краявідам Галандыі. Малюнкі, змешчаныя на пярэднім баку талеркі, адлюстроўваюць характэрны для гэтай краіны пейзаж: невялікія парусныя судны каля нізкіх берагоў, над якімі ўзвышаюцца ветраныя млыны. Распаўсюджанай была практыка, згодна якой на таўры згаданай фірмы ўказвалася найменне ўзору (тэматыкі малюнкаў, якімі распісваўся посуд). У дадзеным выпадку на таўры змешчаны надпіс “Delftland”, які адсылае да наваколляў галандскага горада Дэлфт – вядомага цэнтра вытворчасці керамікі. Фірма пад назвай “Brown-Westhead, Moore & Co” існавала ў прамежку часу з 1862 па 1904 год і спецыялізавалася на выпуску глінянага посуду і фарфору. Завод-вытворца размяшчаўся ў горадзе Хэнлі (пазней увайшоў у склад горада Сток-он-Трэнт) графства Стафардшыр. Прадукцыя кампаніі адрознівалася надзвычай высокай якасцю, карыстаючыся высокім попытам як у Англіі, так і за яе межамі.