Ваза Гуань

Ваза гуань прызначалася для захоўвання чаю, салодкага, навагодніх падарункаў і шашак «го». Чарапок тоўсты, злёгку шэраваты, паліва белая бліскучая. Тулава мае шарападобную форму, аснаванне круглае плоскае. Ножка невысокая, звужаная ў месцы пераходу ў тулава. Горла шырокае з пашырэннем уверсе. Накрыўка круглая, выпуклая з бортам, адагнутым уніз. У верхняй частцы тулава размешчаны ручкі, стылізаваныя пад звярыныя маскі. Наверша накрыўкі ў выглядзе фігуры льва «Фо». Тулава ўпрыгожана раслінным арнаментам з вінаграднай лазы з гронкамі, лісцем і кветкамі. У картушы адлюстравана кітайская сюжэтная сцэна: палюбоўнікі ў садзе, побач стаіць служанка. З супрацьлеглага боку ў фігурным картушы адлюстравана сцэна: спадарыня са служанкай на тэрасе прымаюць падарункі праз пасыльнага. На накрыўцы арнаментальны роспіс, аналагічны роспісу на тулаве: вінаградныя гронкі, у картушах букеты кветак. Унізе на ножцы элементы добразычлівай сімволікі - прадметы з «васьмі каштоўнасцей» (ба бао) - зліткі срэбра, музычны камень, ромб, пераплецены стужкамі.