Вулічны паказальнік «Dombrowskistr.»

Вулічны паказальнік часоў Другой сусветнай вайны з надпісам на нямецкай мове “Dombrowskistr.” (“вуліца Дамброўскага”). Музейны прадмет цікавы найперш тым, што мае непасрэднае дачыненне да гісторыі гета Глыбокага, вязнямі якога ў гады вайны сталі тысячы жыхароў горада яўрэйскай нацыянальнасці, паколькі вуліца Дамброўскага (зараз – вуліца Чырвоных Партызан) знаходзілася на тэрыторыі гета. Час стварэння паказальніка абмяжоўваецца 1941 – 1943 гадамі. Паказальнік уяўляе сабой драўляную дошку памерамі 20 х 65 см, пярэдні бок якой пафарбаваны ў белы колер, паверх якога выведзены чорныя лацінскія літары назвы вуліцы. Дадатковую цікавасць у дачыненні да экспаната дадае той факт, што ў глыбоцкім гета працавала невялікая майстэрня, супрацоўнікі якой займаліся вырабам разнастайных плакатаў, шыльдаў, партрэтаў і г. д. Гэта дазваляе меркаваць, што вулічны паказальнік “Dombrowskistr.” не толькі знаходзіўся на адной з вуліц гета, але і быў зроблены яго вязнямі.