Анатацыя
Маляваны дыван беларускага мастака Язэпа Драздовіча. Гэты жывапісны твор змяшчае даволі дакладную выяву рэальнага архітэктурнага помніка – касцёла Найсвяцейшай Дзевы Марыі вёскі Задарожжа Глыбоцкага раёна.
Сюжэт дывана прасякнуты таямнічасцю: на палатне мы бачым начны краявід, цэнтральную частку якога займае гатычны храм. Праз яго вокны і дзверы прабіваецца яркае святло, а да ўваходу ў храм доўгім ланцугом накіроўваюцца шэрыя постаці людзей, падобных на манахаў. Дапаўняе малюнак цёмнае неба з маладзіком, высокія яліны і возера, у якім адлюстроўваецца касцёл.
Маляваныя дываны вядомы на Беларусі з канца XIX стагоддзя, але найбольшае іх распаўсюджванне адбылося ў 1930 – 1950-х гадах, калі вялася інтэнсіўная адбудова вёскі. Насценныя дываны ў гэты час былі галоўным упрыгажэннем інтэр’еру сялянскай хаты. Маляваныя дываны Язэпа Драздовіча, большасць з якіх былі створаны на Глыбоччыне ў 1930 – 1940-я гады, адрозніваюцца непаўторнымі ўзорамі і сюжэтамі, і з’яўляюцца вялікай культурнай каштоўнасцю нашай краіны.